साउन ५, काठमाडौं। आईतबार देखिको लगातार झरीले देशभरको जनजीवन प्रभावित भएको छ। देशका अधिकांश क्षेत्र बाढी , पहिरो र डुबानको चपेटामा परेको छ।
निरन्तर परेको वर्षाले साना तथा ठूला खोलामा पानीको मात्रा बढेर बाढी आइरहेको छ भने पहिरोले सयौंको ज्यान गएको छ। त्यस्तै उपत्यकाका सडक डुबानमा परी सडक अवरुद्ध भएको छ।
पृथ्वी राजमार्ग हिजो सोमबार दिउँसो देखि अवरुद्ध भएको छ। त्यस्तै भक्तपुरको हनुमन्ते खोलाको बाढीले खोला आसपासका बासिन्दा त्रसित भएका छन् भने अरनिको राजमार्ग ठाउँ ठाउँ डुबानमा परेको छ। सडक डुबानमा पर्दा सवारी साधन बीच बाटोमा रोकिएको छ।
ललितपुरको इमाडोल र गोदावरी खोला वरिपरिका क्षेत्रमा सोमबार दिउँसो देखि डुबानमा परेको छ । आज बिहानै धादिङको त्रिपुरासुन्दरी गाउँपालिकामा खसेको पहिरोले एकै परिवारको तीन जनाको मृत्यु भएको छ।
