चितवन निकुञ्ज क्षेत्र भित्र पसेको कारणले सेनाद्वारा एक चेपाङ युवाको निर्ममतापूर्वक हत्या भएको छ।
निकुञ्ज क्षेत्रभित्र घुङ्गी टिप्न गएका २४ वर्षिय राजकुमार प्रजाको सेनाद्वारा बुटले बजारी बजारी हत्या गरिएको हो ।
साउन १ गते राजकुमार सहित छिमेकी साथीहरु बागमती नदी तरेर निकुञ्ज क्षेत्रभित्र छिरेको थियो। त्यही समयमा राजकुमार माथि सेनाले निर्ममतापूर्वक कुटपिट गरेको बताइएको छ । सेनाको कुटपिटबाट बाँचेका राजकुमार घाइते अवस्थामा घर पुगे र सामान्य औषधी उपचार गर्दा गर्दै साउन ४ गते रगत छाडेर मृत्यु भएको राजकुमारको परिवारले बताए।
प्रकृतिसँग जोडिएर जीवन गुजारा गर्ने चेपाङमाथिको यो अन्याय मानवता बिर्साउने खालको छ। देश र जनताको रक्षा गर्ने प्रतिबद्धता जनाएका नेपाली सेनाले गरेको यस्तो कायरतापूर्ण व्यवहारको जवाफ कसले दिन्छ? गल्तीको सजाय दिनुपर्छ तर कुन गल्तीको सजाय कतिसम्म दिनेहो यसको निर्धारण कसले गर्छ ?
एक गरिबको छोरा, पिछडिएको जनजातिको छोरा भएकै कारण यति निर्दयी हत्या गरेर बल र पदको रवाफ देखाउनु कहाँ सम्म उचित हो। गल्ती गरेकै भए सम्झाइ बुझाइ गरी पठाउन सकिन्थ्यो तर पहुंचविहिन भएकै कारण ज्यान नै लिई छाडे परिवारको सहरा नै छिनी दिए।
