धनकुटा। धनकुटाको किबीबाट उत्पादन ‘प्रिन्सेस’वाइन बजारमा आउने तयारीमा छ । माउण्ट एभरेष्ट वाइनरीद्घारा उत्पादन गरिएको वाइन नेपाली बजारमा चाँडै नै आउने तयारीमा रहेको कम्पनीले जनाएको छ ।
किबी फलसँगै अन्य फलफूलबाट उत्पादन गरेको प्रिन्सेस वाइनको बजारीकरणको तयारी गरिरहेको कम्पनीका प्रवन्ध निर्देशक विष्णु बास्तोलाले जानकारी दिए । उनका अनुसार केहि दिनमै नेपालको प्रमुख शहरहरुसँगै नेपाली बजारमा आउने तयारी रहेको छ ।
प्रबन्ध निर्देशक बास्तोलाका अनुसार उत्पादनको काम सबै सकिएको र बजारमा लैजान तयारीमा रहेको बताए । लकडाउनको कारण हामीले बजारमा लान सकेको छैनौं, उनले भने, ‘अब चाँडै नै लैजाँदै छौं ।’
नेपाली युवायुवतीलाई लक्षित गरि वाइन उत्पादन गरिएको छ । बजारको भन्दा फरक स्वादमा पाउने कम्पनी जनाएको छ । अर्गानिक वाइनको पूर्वी नेपालसँगै पोखरा र काठमाडौं बाहिर सुदूर तथा मध्यपश्चिमाञ्चल क्षेत्रसम्म बजारीकरण तीब्र बनाइने कम्पनीले जनाएको छ ।
नेपालको प्रमुख सहरहरुमा व्यापार केन्द्रीत गर्दै जापानसम्म पुर्याउने सोच बनाएको प्रबन्ध निर्देशक बास्तोलाले बताए ।
धनकुटाको राजारानीमा माउण्ट एभरेष्ट वाइनरी उद्योग स्थापना भएसँगै स्थानीय कृषक लाभान्वित भएका छन । रातो र सेतो कलरमा वाइन बनेको छ, कम्पनीका अध्यक्ष हरेराम साहले भने, ‘ यो वाइन नेपालीले मात्रै नभइ विदेशीले समेत मन पराउनेमा ढुक्क छु ।’
पहाडी क्षेत्रमा उत्पादित सबै आर्गनिक फलफूललाई पहिलो प्राथमिकता दिएर वाइन उत्पादन गरेको हो ।
