भदौ २२, काठमाडौं। पछिल्लो २४ घण्टामा नेपालमा थप ९७९ जनामा कोरोना भाईरस संक्रमण पुष्टि भएको छ। स्वास्थ्य तथा जनसंख्या मन्त्रालयले आज ( सोमबार ) प्रेस ब्रिफिङमा ३३८ महिला र ६४१ पुरुष गरी ९७९ जना संक्रमित थपिएको जानकारी दिएको हो।
कोरोना संक्रमणमुक्त हुनेको संख्यामा भने दिनहुँ वृद्धि भइरहेको मन्त्रालयको पछिल्लो केही दिन देखिको तथ्यांकले देखाएको छ।पछिल्लो २४ घण्टामा देशभर विभिन्न क्षेत्रका अस्पतालबाट जम्मा एक हजार ७३६ जना संक्रमणमुक्त भएका छन्।हालसम्म ३० हजार ६७७ जना कोरोना संक्रमण मुक्त भएका छन्।
त्यस्तै आज थप ११ जना कोरोना संक्रमणका कारण मृत्यु भएको छ । नेपालमा संक्रमणबाट अहिलेसम्म ३०० जनाको ज्यान गइसकेको छ।
काठमाडौं उपत्यकामा ३७, ९० र ८३ वर्षिया तीनजना महिलाको मृत्यु भएको छ। त्यसैगरी ६३ वर्षिया महिला , सिरहाका ८७ र ६२ वर्षका दुई पुरुष, सर्लाहीका ३५ वर्षिय पुरुष, दोलखाका ६९ वर्षका पुरुष, मकवानपुरका ३९ वर्षका पुरुष र बाँकेका ३९ वर्षका पुरुषको मृत्यु भएको स्वास्थ्य मन्त्रालयका प्रवक्ता प्राडा जागेश्वर गौतमले बताउनुभयो।
