असोज २, काठमाडौं। पछिल्लो २४ घण्टामा थप दुई हजार २० जनामा कोरोना संक्रमण पुष्टि भएको छ । एकै दिन कोरोना संक्रमित देखिएको यो अहिलेसम्मकै उच्च रहेको छ । योसँगै नेपालमा कोरोना भाइरस संक्रमितको संख्या ६१ हजार ५९३ जना पुगेको छ ।
देशका विभिन्न प्रयोगशालामा गरिएको ११ हजार ४५८ जनाको पिसीआर परीक्षणमा दुई हजार २० जनामा कोरोना पुष्टि भएको स्वास्थ्य तथा जनसङ्ख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले जानकारी दिए । शुक्रबार थपिएका संक्रमित पुरुष एक हजार ३८१ तथा महिला ६३९ रहेका छन् ।
हालसम्म ४३ हजार ८२० जना कोरोना भाइरसबाट मुक्त भएका छन्। पछिल्लो २४ घण्टामा ८७१ जना कोरोना निको भएर घर फर्किएका छन् । हालसम्म ८ लाख ९४ हजार जनाको पिसीआर गरिएको छ । पाँच सयभन्दा बढी संक्रमित भएका जिल्लामा काठमाडौँ, ललितपुर, भक्तपुर, मोरङ, सिरहा, सुनसरी, मकवानपुर, रुपन्देही र चितवन रहेका छन् । यस्तै हाल संक्रमित नै नरहेका जिल्लामा रसुवा, डोल्पा, हुम्ला, मुगु, सोलुखुम्बु र मुस्ताङ रहेका प्रवक्ता गौतमले बताउनुभयो ।
हाल १७३ संक्रमितको आइसियुमा उपचार भइरहेको र ३६ संक्रमितलाई भेन्टिलेटरमा राखी उपचार गरिरहेको मन्त्रालयले जनाएको छ ।
हाल देशभर १७ हजार ३८३ जना सक्रिय संक्रमित रहेका छन् ।
मन्त्रालयका प्रवक्ता डा गौतमका अनुसार पछिल्लो २४ घण्टामा बागमती प्रदेशका एक हजार ११६, प्रदेश नं ५ मा २०५, प्रदेश नं १ मा १८७, प्रदेश नं २ मा १७६, गण्डकी प्रदेशमा १४८, कर्णालीमा १४१ तथा सुदूरपश्चिममा ४७ जनामा कोरोना संक्रमण पुष्टि भएको छ ।
यी पाँच प्रदेशका कुन कुन जिल्लामा देखिए कोरोना संक्रमित?
प्रदेश नं १ : उदयपुरमा २, भोजपुरमा दुई, ओखलढुंगामा एक, झापामा ६, मोरङमा ११८ तथा सुनसरीमा ५८ जनामा कोरोना संक्रमण पुष्टि भएको छ ।
यस्तै प्रदेश नं २: धनुषामा ९, पर्सामा १७, बारामा ७८, रौतहटमा ६, सप्तरीमा ४५, सर्लाहीमा २ तथा सिरहामा १९ जनामा कोरोना देखिएको छ ।
बागमती प्रदेश : काठमाडौँमा ६९८, काभ्रेपलाञ्चोकमा ६, चितवनमा १९१, दोलखामा एक, धादिङमा १४, नुवाकोटमा ६, भक्तपुरमा ८२, मकवानपुरमा ३०, रामेछापमा ६, ललितपुरमा ७९ तथा सिन्धुपाल्चोकमा तीन जनामा कोरोना पुष्टि भएको छ ।
गण्डकी प्रदेश : कास्कीमा ८६, गोरखामा १२, तनहुँमा ५, नवलपरासी पूर्वमा ३९ तथा लमजुङमा ६ जना कोरोना संक्रमित भेटिएका छन् ।
प्रदेश नं ५ :अर्घाखाँचीमा ९, कपिलवस्तुमा ६, गुल्मीमा ६, दाङमा २४, नवलपरासीमा ४१, पाल्पामा ३, प्युठानमा एक, बर्दियामा १८, बाँकेमा २, रुपन्देहीमा ८६ तथा रोल्पामा ९ जनामा कोरोना संक्रमण पुष्टि भएको स्वास्थ्य मन्त्रालयले जनाएको छ ।
कर्णाली प्रदेश: सुर्खेतमा ११७, रुकुम पश्चिममा २३ तथा दैलेखमा एक ,सुदूरपश्चिम प्रदेशको कञ्चनपुर ७, कैलालीमा १७, अछाममा १६, बाजुरामा ३, डोटीमा एक, बैतडीमा २ तथा बझाङमा एक जनामा कोरोना संक्रमण पुष्टि भएको छ ।
