मंसिर ११, काठमाडौं। प्युठानबाट बिरामी बोकेर काठमाडौं जाँदै गरेको लु१च ९७३१ नम्बरको पिकअप भ्यान त्रिशूलीमा खस्दा तीन जना बेपत्ता एक जना घाइते भएका छन्।
इलाका प्रहरी कार्यालय मुग्लिनका अनुसार इच्छाकामना गाउँपालिका ४ नाग्दी खोलाबाट लु१च ९७३१ नम्बरको पिकअप भ्यान बिहीबार बिहान साढे पाँच बजे सडकबाट करिब ६० मिटर तल त्रिशूलीमा खसेको हो।
त्रिशूलीमा खस्दा पिकअपमा सवार चारमध्ये एक जना घाइते भएका छन् भने अन्य तीन जना नदीमा बेपत्ता भएको प्रहरीले जनाएको छ। घाइते हुनेमा प्युठान घर भएका ३८ वर्षीय मुकुन्दबहादुर रोक्का रहेको र उनलाई उपचारका लागि भरतपुर अस्पताल पठाइएको प्रहरीले जनाएको छ।
यस्तै बेपत्ता हुनेमा प्युठानको झिम्रुक गाउँपालिका १ का भ्यान चालक २३ वर्षीय सूर्य केसी, दुर्घटनाबाट बच्न सफल मुकुण्डका बिरामी छोरी १५ वर्षीया जिनिसा रोक्का , पत्नी ३३ वर्षीया जमुना रोक्का रहेका छन्। घाइतेको उपचारका लागि भरतपुर अस्पताल पठाइएको र अन्यको खोजीकार्य भइरहेको प्रहरीले जनाएको छ।त्रिशूलीमा खसेको पिकअप पानीले डुबेर नदेखिने अवस्थामा छ।
