असार १५, काठमाडौं । हेटौँडामा मृत भेटिएकी सुस्मिता क्षेत्री थापाको हत्यामा संलग्न भएको आरोपमा प्रहरीले ४ जनालाई पक्राउ गरी आज सार्वजनिक गरेको छ ।
हत्या प्रकरणमा संलग्न मृतक सुस्मिताका ससुरा प्रकाश थापा , सासू तुलसा थापा , नन्दहरु दुर्गा थापा र सीतालाई पत्रकार सम्मेलन गरी प्रहरीले सार्वजनिक गरेको हो ।
सुस्मितालाई ससुराले काठको लौरो र नन्द सीताले लोहोराले हानेर हत्या गरेको प्रहरीले दावी गरेको छ । पक्राउ परेकी सासू र घटनाको समयमा काठमाडौँमा भएकी जेठी नन्दको पनि हत्यामा संलग्नता रहेको र त्यस सम्बन्धी थप अनुसन्धान भइरहेको प्रहरीले जनाएको छ ।
६ महिना अघि दुर्घटनामा मारिएका सुस्मिताका पति रुपेन्द्र कार्यरत संस्थाबाट तलब, भत्ता तथा बीमासमेत गरी प्राप्त हुने रु ३८ लाख २८ हजार तथा पतिको दुर्घटनापछि क्षतिपूर्तिवापत सुस्मिताले प्राप्त गरेको रु पाँचलाखको विवाद, ससुराले गरेको बलात्कार प्रयासको घटना बाहिरिने डर लगायतले उनको हत्या भएको अनुसन्धानबाट खुलेको जिल्ला प्रहरी कार्यालय मकवानपुरका प्रहरी उपरीक्षक सुशीलसिंह राठौरले पत्रकार सम्मेलनमा जानकारी दिएका हुन्।
