असार २२, काठमाडौं। मास्क नलगाई घरबाहिर निस्कनेलाई पक्राउ गर्न गृह मन्त्रालयले निर्देशन दिएको छ।
गृह मन्त्रालयका प्रवक्ता (सह-सचिव) केदारनाथ शर्माले देशभरका प्रमुख जिल्ला अधिकारी र प्रहरी प्रधान कार्यालयलाई यस्तो निर्देशन दिइएको जानकारी दिए।
‘यसअघि नै निर्देशन दिइएको हो। पालना नभएको पाइएकाले फेरि निर्देशन दिएका छौं,’ उनले भने, ‘मास्क प्रयोग गर्न, मिटरको दूरी कायम गर्नुपर्ने र स्यानिटाइजरको प्रयोग अनिवार्य गर्न गराउन निर्देशन जारी भएको छ।’ निर्देशनको अवज्ञा गरेको पाइएमा पक्राउ गरिने पनि उनले बताए ।
‘स्वास्थ्य मापदण्ड पालना नगर्दा राजधानी नै संक्रमणको उच्च जोखिममा रहेको देखिएकोले गृहको निर्देशन र परिपत्र सरकारी, गैरसरकारी र निजी क्षेत्र तथा स्वयं सर्वसाधारणलाई कडाईका साथ लागू गर्न प्रशासन र प्रहरीलाई परिपत्र गरेका हौं,’ उनले भने, ‘निर्देशन उल्लंघन गर्नेलाई पक्राउ र जरिवाना सम्मको कारबाही हुन्छ।’
सरकारले असार १ गतेबाट सामान्य सावधानी अपनाएर लकडाउन खुकुलो बनाएको थियो। त्यसयता सडक, बजार, कलकारखानामा मास्क र सेनिटाइजर प्रयोग नगर्ने र सामाजिक दूरी पालना नगर्ने प्रवृत्ति बढ्दै गएको छ।
